"Студент-донор" ұйымының жігіттері мен қыздары мүмкіндіктері болған кезде, өтеусіз қан донорлығына әрқашан қуана қатысады!

Күн сайын Абай облысының Облыстық қан орталығы қала және жалпы облыс бойынша қанға мұқтаж реципиенттерді емдеу мақсатында қан компоненттерінің қажетті мөлшерін жинақтайды. Біздің донорлар белгілі бір қан топтарына деген қажеттіліктің үнемі өзгеріп, жаңарып отыратындығын жақсы біледі. Сондықтан да осы жағдайды жақсы білетін донорлар біздің Instagram парақшамыздағы қан топтарының қажеттілігі туралы ақпаратты бақылап отырады немесе бізге алдын — ала қоңырау шалады. «Студент-донор» ұйымының белсенділері де сол санаттылардың қатарынан.
Қымбатты донорлар, белсенді өмірлік ұстанымдарыңыз бен қанға мұқтаж реципиенттерге деген риясыз көмектеріңіз үшін, жақын-жуықтарыңызға көмектесуге деген шынайы ниеттеріңіз үшін Сіздерге рақмет! Барлық бастамаларыңызға сәттілік тілейміз! Сіздер өскелең ұрпақтарыңызға үлгісіздер, өйткені донор болу-бұл игі әдет!